LETRAS GALEGAS

Este proxecto traballámolo con intensidade e dedicación nas aulas partindo de páxinas web como:

 https://consellodacultura.gal/album-de-galicia/detalle.php?persoa=22279

https://academia.gal/letras-galegas/2026/begona-caamano

https://primaveradasletras.gal/

http://seminariogalan.org/inicio/portada/documentos/

Así como os carteis enviados pola consellería, de maneira dinámica e lúdica coñecemos a figura de Begoña Caamaño, homenaxeada neste ano 2026. Con tal motivo fixemos un mural entre todo o alumnado do centro, nel temos un código QR que enlaza con un vídeo moi interesante sobre a súa vida.

LETRAS GALEGAS 2025

 Celebramos con moita ledicia este día. A  música, poesía e instrumentos fannos vibrar, saltar e enchernos de emocións positivas, que compartidas entre toda a comunidade educativa, fixemos así unha xornada especial.

Feliz día das LETRAS GALEGAS 2025.

Grazas Papuxas, nais, avoas, amigas das nosas nenas e nenos por  dedicarnos o voso tempo e arte coa pandeireta, cantareiras co corazón💓

17 DE MAIO. DÍA DAS LETRAS GALEGAS

 

Coma sempre dicimos, o Día das nosas Letras non pode quedar aí. Nós  imos dando pasiños ao longo de todo o ano coas nosas actividades e lecturas en lingua galega. No mes de maio este traballo medra un pouquiño máis ó poñer a nosa atención na escritora/escritor que cada ano é homenaxeada. Este curso temos unha impresionante persoa, Luísa Villalta,  que pouco a pouco imos descubrindo: poeta, escritora de textos moi diversos, docente, música e, por riba de todo, faladora activa no galego. Luísa Villalta ten que ser o noso modelo!.

Daquela no cole estamos a desenvolver moitas actividades arredor da súa persoa: actividades documentais, obra literaria, música do seu violín e da súa poesía, lectura de textos, paisaxes e bosques da súa vida,... Creamos e falamos en galego coa axuda dos materiais que  nos ofrecen dende outros centros e mais dos propios que temos elaborado nós. O traballo está en marcha. Imos seguir neste camiño durante todo o mes, pero celebramos este día achegándovos algúns petiscos do que se coce nas aulas.

Carteis sobre Luísa Villalta

Lemos e observamos algúns intres da súa traxextoria vital e literaria.

A palabra do día

Día tras día Luísa vainos agasallando cunha verba especial. Con ela aprendemos a lingua, observamos, matinamos nas nosas experiencias arredor dela, debuxamos, pescudamos, facemos traballo de campo,... A súa teima, o noso PDI. Os pequenos de infantil de 5 e os de 1º, os que máis gozan,  con esta chuvia lingúística.

Pescudamos na súa vida

4º de primaria

Traballamos coa súa imaxe

5 anos

Comecocos 

 3º de primaria

Poemas para ilustrar

Taboleiros robóticos especiais

E moito máis que xa vos iremos contando!

Mentres, celebrade o Día falando a nosa lingua.

A PALABRA DO DÍA E O TRABALLO DE CAMPO

 Na aula de 5 anos andamos sempre a mesturar todo. Non sabemos mira-las cousas dende un só punto de vista. Cando coñecemos que a palabra do día era mexacán... (como? mexa...que? Ah, dente de león! ) xa nos emocionamos. Esa flor xa existía canda os dinosaurios! (teima na que tamén estamos metidos). Fixemos a nosa ficha coa palabra e quixemos saber mais. Na foto vimos a flor amarela e a flor de soplar. Son dúas diferentes! Noon, xa averiguamos que é a mesma e pasa con diversos cambios de flor a semente.

Coma no cole temos moitas flores, quixemos rematar a mañá facendo un estudo de campo. Queriamos averiguar cantas de cada clase atopabamos no patio. Un mundo! Descubrimos que nos faltaba unha categoría por contar, a do momento no que xa non está a flor pero tampouco a semente. Terémola que engadir na nosa folla de rexistro.!

4º TAMÉN CELEBRA A DON PACO

 Un cartafol informativo  e un comecocos son dous dos traballos cos que os nenos e nenas de 4º mergulláronse na vida e obra do autor homenaxeado nas Letras Galegas, Francisco Fernández del Riego.

FELIZ DÍA DAS LETRAS

 Pasiño a pasiño imos construindo no cole pequenas aprendizaxes.  A lingua, a nosa lingua, é unha destas aprendizaxes na que o esforzo ten que multiplicarse. A lingua é algo de noso, a materna e maila adquirida; tanto ten cal sexa o caso. As nosas dúas linguas forman parte do noso medre e ningunha pode quedar atrás. Pero este traballo apenas comezado dende a escola, ten que ir máis aló. E non se trata só de falalas, que tamén é moi importante, senón en gran medida dos afectos, do amor polas nosas linguas.

Hoxe, 17 de maio, celebramos a festa homenaxe á nosa lingua galega. Homenaxe ás persoas que loitaron no seu tempo por ela e que nos deixaron os seus libros e a pegada do seu traballo e a súa adicación. Francisco Fernández del Riego loitou para que o galego non se perdese e afondou en tódolos eidos da cultura popular para que non esquezamos o xérmolo lingüístico que os nosos antergos  sementaron e cultivaron.

Agora é a nosa quenda de seguir sementanto nos nosos cativos este amor  pola lingua e coidando o seu medre e a súa aprendizaxe. A diversidade tamén cabe aquí. Ter dúas linguas é unha riqueza que temos na nosa man. Se as perdemos, perderemos tamén unha parte de nós.

No cole traballamos estes días coñecendo a figura de Don Paco e achegándonos ó noso patrimonio, ó que lle deu tanto valor. No traballo cotiá haberemos de mante-la nosa fala viva, usándoa e aprendéndoa ben. Non é cousa só dun día e máis é traballo de todos. 

ACTIVIDADES FAMILIAS

ROBOT E LETRAS GALEGAS

 Aínda que foron varias as aulas que xogaron co robot nas Letras galegas coas plantillas que preparamos para o traballo na aula STEM, só dispoñemos das fotos dos peques de 5 anos coñecendo os autores homenaxeados en cursos pasados.

SALVE... DÍA DAS LETRAS GALEGAS

 Os autores que celebramos curso a curso traen sempre a súa mochila de vida chea do amor e a loita polo noso, polas nosas tradicións e a nosa lingua. Florencio Delgado Gurriarán, ao que vimos coñecendo dende que comezou a celebración do mes das Letras Galegas, non foi menos. Ademais de expresar coas palabras as súas emocións, transmítenos o amor polo galego e por todo o que é de noso.

Este poema adicado á bandeira galega dá boa conta disto.

VISITA DE ÉRICA ESMORÍS

Patio de luces, este é o título do último libro que limos xuntos na escola. A súa autora, Érica Esmorís, visitounos o martes día 10 de maio para compartir con nós a historia que se agocha detrás desta marabillosa historia. Un confinamento, vellos recordos da nenez, un edificio de veciños, un porteiro entrañábel... E para nós, os nenos e nenas de 3º e 4º, un pracer escoitala e aprender... Mil grazas.

 

AÍ VEN O MAIO... DE FLORENCIO

 

MÁIS LECTURA ORAL EN 3º DE PRIMARIA

 Faltaba por publicar unha derradeira  lectura dos nenos de 3º de primaria adicada a Xela Arias. Trátase den novo relato de Gianni Rodari

AQUI O TEDES

LETRAS GALEGAS NAS AULAS

 Esta primeira parte do mes as aulas estiveron centradas na lectura oral dos textos de Xela. Agora xa temos un pequeno arquivo en audio das cousas que escribiu e traduciu e que podedes escoitar cando queirades. Tamén, nalgunhas das lecturas enviadas polas nosas familias, atrevéronse con textos de Xela, coma fixeron Noa e Ada e Paula.

Para conmemorar o día, ademais de todo o traballiño feito para coñecer á nosa autora, fixemos uns marcalibros e /ou medallóns que serverán para nos lembrar quen é esta escritora homenaxeada. Aquí tedes algunha mostra. 

OS MAIOS, TAMÉN NAS LETRAS GALEGAS

 Lara (1º de primaria) e Claudia (4º de primaria) pasaron a xornada das Letras Galegas recollendo flores e construindo o seu propio maio. Pasárono fenomenal. Estupendo!

LENDO A XELA DENDE CASA

 Paula de 4º de Primaria envía dende casa  a súa lectura dun conto de Gianni Rodari traducido por Xela Arias.

A LECTURA DE PAULA

INSECTOS DA FRAGA EN 3 ANOS

 Xela Arias deixounos un fermoso relato, feito con 11 anos, no que a fraga galega é a protagonista. Daquela pareceunos boa idea pescudar un pouquiño nos bichiños das paisaxes galegas e familiarizarnos cos seus nomes. Este traballiño axúdanos ademais a coñecer mellor o mundo dos bichiños, ao tempo que estamos a coñecer  algúns dos principais polinizadores da froita dentro do noso PDI.  Paga ben a pena coñecelos para coidalos mellor; aínda que teñamos que ser moito máis coidadosos se cadra cos que  nos poden picar. A saúde nosa e maila do planeta é o primeiro.

Os nenos de 3 anos agasállannos con estas fotos para que  os poidamos ver máis de preto. Outras aulas tamén están traballando neste mundiño e enseguidiña amosarannos tamén as súas descobertas.