EXPOLIBRO

Celebramos a semana do libro,  con gran afluencia de público da comunidade escolar, na nosa biblioteca. Moitas grazas a editoriais como Xerais, Kalandraka, Consorcio Editorial, Vicens, Edelvives, Oqo e Cuarto de inverno que nos prestaron os seus exemplares en galego , así puidemos disfrutar deles . Fermosos libros en galego  que agachan historias máxicas e divertidas.

Sorteamos tres lotes de libros, algúns deles son agasallo das editoras e outros mercados polo centro.

Esta actividade tivo moi boa acollida. Grazas a todos por tanta ilusión.

Maxia e castañas con Lucía Mojón

Hoxe tivemos o pracer de recibir no noso colexio á escritora Lucía Mojón, quen compartiu cos alumnos de 1º e 2º de primaria unha mañá máxica chea de contos e imaxinación. ✨️🍂

Lucía presentoulles o seu conto "Biscoito de castañas" e explicoulles como xurdiu a idea para crealo. Os nenos descubriron fascinados que o libro esconde un xogo secreto que fai a lectura aínda máis divertida. A sesión estivo chea de momentos especiais: cantaron xuntos a canción do conto, deixaron voar a súa imaxinación debuxando seres monstruosos que poderían formar parte da historia, e para terminar, Lucía dedicou persoalmente o conto aos nosos pequenos lectores.

Unha experiencia inesquecible que sen dúbida espertou nos nosos alumnos o amor pola lectura e a creatividade.

A COMICTECA

 Este luns, día 24 de novembro, o alumnado de 1º e 2º do cole fixemos unha saída á Biblioteca Teatro Afundación para coñecer a súa COMICTECA, un espazo no que o cómic é o gran protagonista.

Comezamos coñecendo un pouco a historia do edificio e facendo unha liña do tempo desde os seus inicios, cando aínda era o teatro Rosalía De Castro, ata a actualidade… Logo traballamos nos nosos propios cómics, facendo pequenos grupiños e coreando e pensando na historia que neles queriamos contar.

Rematamos facendo unha pequena pescuda na sala da Comicteca para atopar aqueles exemplares que máis se axustaban á nosa idade.

Deixamos unha breve escolma da nosa experiencia…

Gozando da lectura!

Esta semana os nenos e nenas de 2º de primaria estrearon un novo recuncho de lectura. Onde estiveron 

disfrutando e aprendendo moitas cousas sobre o coidado da natureza a través de libros infantís que abordan temas como a importancia da reciclaxe, a biodiversidade ou a conservación do medio ambiente.

VISITA DE MARÍA CANOSA

Formando parte das actividades da semana do libro na nosa escola hoxe os alumnos de 3º e 4º recibimos a visita da escritora María Canosa, autora de “Escola de bruxas”, historia que limos nas nosas clases durante estas últimas semanas e coa que gozamos e aprendimos dun xeito moi especial. 

María falounos das súas motivacións para escribir esta historia, así como dos valores que ela quería transmitir coa súa lectura: o valor da amizade, do esforzo, da familia… Toda unha lección de vida que nós agradecemos moitísimo e que nos anima a seguir lendo para encher as nosas vidas de aventuras e soños.

Mil grazas a todas as persoas que escriben e espertan a nosa imaxinación para transportarnos a mundos descoñecidos e enriquecer así as nosas vidas. Grazas María!

NOVO CONTACONTOS NA HORA DE LER

 Unha vez máis a chuvia chafou os nosos plans de gozar da lectura no exterior. Estes derradeiros días de curso os animados contacontos do recreo esfórzanse en le-los seus contos a distintas aulas. Medelyn de 4º leu o pasado luns Animais de compañía ós cativos de 1º.

CONTACONTOS E VISITA DE AUTOR NO PRIMEIRO CICLO

David Rodríguez, autor e ilustrador do libro “Superavoa”, visitou o noso centro para contarnos a 1º e 2º curso de primaria, os grandes poderes de Rita, unha superheroína, que ben podería ser a avoa de calquera de nós.

Con este conto cheo de tenrura e de humor, o autor quixo homenaxear a todas as nosas avoas, contando os poderes que acostuman a ter todas elas: adiviñar o frío que vai na rúa, curar dores de barriga coa súa man máxica…

O noso alumnado tamén quixo compartir historias propias de cadansúa avoa, polo que resultou ser un contacontos moi emotivo.

Para rematar, e coa guitarra nas mans, o autor ensinounos unha canción, que coreamos con forza no retrouso.

VISITA DE AUTOR PARA 3º E 4º

 Este martes, día 21 de maio, visitounos na biblioteca do cole o escritor Eduardo Santiago, autor da obra "A miña amiga invisible". Contounos algunhas cousiñas sobre o proceso de creación do libro, así como de todo aquilo que o inspirou para comezar a escribilo...

A verdade é que gozamos moito coa súa lectura, e aprendemos algúns dos mecanismos que existen para enfrontar as dificultades que as veces nos presenta esta fermosa aventura chamada vida.

Ler fainos mellores!

TRABALLO COA PRENSA E LETRAS GALEGAS

 Na clase de 6º de primaria achegáronse a vida e obra de Luísa Villalta dende a lectura da prensa, coa Voz da escola. A voz de Galicia adicou un suplemento esta semana a nosa poetisa homenaxeada no Día das Letras Galegas. A prensa é un texto moi útil nas aulas, un recurso que temos que seguir aproveitando.

DÍA DAS ESCRITORAS 2023

 Adoita ser a primeira efeméride do curso e rende homenaxe ás letras en galego e en feminino. Un ano máis sumámonos á celebración mundial do Día das escritoras engadindo dous nomes máis á nosa listaxe de contadoras de contos. Na biblio temos xa un andel adicado á Ánxeles Ferrer e mais á Irene Pérez Pintos, autoras e ilustradora, a primeira, de moitos dos contos que gozamos curso a curso. De certo que nesta nova andaina tamén imos botar man delas!

,

PADRIÑOS LECTORES

 Pechamos a actividade na biblioteca, despois dun curso intenso de experiencias variadas, co tradicional padriños lectores. Un ano máis os padriños e madriñas recolleron ós seus afillados e afilladas e invadiron tódolos recunchiños do noso patio ben cargadiños con mil e un contos. Durante case unha hora leron e cambiaron contos cos compañeiros e encheron  dun marabilloso marmurio lector os lugares onde sempre xogan e corren. Hoxe foron incansables no debullar as historias dos contos, moitas xa coñecidas doutros tempos lectores. Lectores e escoitadores concentráronse en cada palabra escrita e intercambiaron pequenos agasallos feitos con moita ilusión e xogos lectores e dos de sempre. O ano vindeiro volveremos gozar destes intres que axudan a amar a  lectura e tamén a sentirnos parte da nosa comunidade.

UN RICO PASTEL

 O conto Un rico pastel ,que formou parte de gastronómicas propostas neste curso, acompañounos no día de hoxe nas voces lectoras e os bonecos de Sofía, Olivia, Alana e Julia de 2º. As catro contáronnos a tódolos compañeiros de infantil, 1º e 2º este divertido conto no que sucede que cando son moitos a opinar as cousas non sempre saen como deberían.

FACEMOS PAN TAMÉN EN 5

 Os nenos e nenas de 5 pasaron a mañá de onte megullados na tarefa de facer pan. Mesturaron e amasaron ata conseguir que a masa tivese a textura axeitada para poñela a levedar. Despois dun tempo de espera e cruzando os dedos para que o forno funcionase puideron envolver e levar a casa os bolos feitos por eles. Segundo contaron "as crónicas" os pans estaban moi moi bos. Sodes uns artistas!

METIDOS EN FARIÑA. ESCENAS DOS CONTOS

 No conto Maruxa, que nos encantou, eliximos o personaxe de Pepiño para facer o noso cadro con masa. Fixemos unha composición con barro branco e plastilina coa figura do personaxe e pasámolo moi ben.

CONTACONTOS EN GALEGO NO MES DAS LETRAS

 Despois do éxito de gato lambon Candel, Daniela e Lara de 4º de primaria quixeron repetir a experiencia e leron... Bruno. Infantil e os nenos e nenas de 1º foron os invitados na hora de ler.

O venres, Lucas e Sabrina, tamén de 4º, leron  a 2º de primaria e infantil. Desta vez o conto escollido foi

Rot el más guapo del mundo. Leron e fixeron teatro co personaxe.

En ambalas dúas lecturas pasámolo moi ben. Parabéns para os nosos amigos!