EPHEMERAL ART - ARTE EFÍMERA

Os nenos e nenas de 1º e 2º de primaria despedimos as clases de ARTS cunha actividade de arte efímera. 

Creamos mandalas naturais con elementos que atopamos na nosa contorna.

Velaquí unhas fotos!

 

                  

                    

ARTE CON FLORES EN 4 ANOS

 Os nenos e nenas de 4 fixeron con elementos naturais uns preciosos cadros de primavera. Un xeito emocionante de achegarnos ó noso medio.

COUSIÑAS QUE QUEDARON ATRÁS: A VENDIMA E OUTRAS TRADICIÓNS. ALIMENTÁMONOS EN OUTONO

MARMELO DO COLE, VENDIMA, ZUME DE UVA, LIMONS GALEGOS E MILLO. APRENDEMOS  NO OUTONO SOBRE ALIMENTACIÓN SA.

As fotos da degustación do marmelo podedes velas en instagram.

 

LEITUGAS, LEITUGUIÑAS

A  nosa horta vai dando os seus froitos,  malia o tempo e os caracois. Puidemos ver xa unha das pataquiñas polas que agarda o caldo de Rosalía. De certo que hai moitas máis!. Os nosos amigos de 3 recolleron xa as súas leitugas. Ollade que boa pinta! Os demáis comezaremos enseguidiña tamén a recolleita!.

O NOSO MAIO

 Os nenos e nenas de infantil de 3 e 4 participamos na celebración das festas de primavera tradicionais elaborando coa axuda das familias o noso propio maio. O primeiro día que recibimos aportacións florais non había xestas abondo para "forrar" a estrutura; daquela aproveitamos a facer un mandala floral. Xa o fixeramos o curso pasado e os de 4 queriamos amosarlles os cativos de 3 como se facía.  Quedounos moi aqueladiño e xa que estabamos fóra aproveitamos a plantar unhas  leitugas!

 Días despois, en dúas mañás consecutivas achegámonos á entrada do noso cole para  colocar na estrutura as xestas, os fiunchos, fentos e flores diferentes que trouxéramos da casa. Foron dúas mañás gozando da natureza e aproveitando os recursos naturais para desenvolver a nosa arte e recuperar tradicións. Despois bailamos e cantamos a corro arredor do noso maio. Pasámolo moi ben.

Mágoa que o tempo non acompañou e a chuvia deses primeiros días de maio fixo que non poidesemos traer tanto material vexetal coma outros anos. Non houbo problema! Fomos quen de facer un maio estupendo!

FACENDO BOSQUE NO DÍA DA ÁRBORE

 En infantil tamén celebramos o Día da árbore facendo bosque e horta froiteira. Unha actividade que abrangue dende marzo ata final de curso con plantacións sucesivas e o coidado, no cole e na  casa, de todo o que imos sementando e plantando. O noso castiñeiro, as maceiras e chíbilis de 4 e 5 e os aguacates de 3 ensínannos de primeira man a importancia de coidar as sementes e plantalas para ter unha alimentación de calidade no futuro, ademais doutros moitos beneficios para o planeta.

AMORODOS E LEITUGAS NA HORTA ESCOLAR

 Mentres seguen a medrar as patacas, berzas e fabas plantadas en febreiro seguimos a traballar na horta plantando leitugas e amorodos

AMORODOS NOS ZAPATOS

 Ademáis das petunias que plantamos aí atrás, adornámo-lo noso patio cuns zapatos amorodeiros. A primavera tráenos beleza e moitas vitaminas.  Que bonitos quedan! Mentres coidamos as nosas plantiñas, agardaremos a que as cores vermellas pinten as nosas froitas e poidamos probalas. Non digades que non traballamos polo planeta e pola nosa saúde!

Quixemos tamén continuar o círculo comezado no outono co baleirado das cabazas. Despois de sementar e observar o medre poderemos de novo usar as nosas propias cabazas para celebrar o Samaín e degustar sobremesas e outras receitas feitas con este alimento tan san e tan tradicional.

PRIMAVERA...PLANTAMOS PETUNIAS EN INFANTIL

 No marco do noso obradoiro natural os nenos e nenas de infantil non só queremos plantar verduriñas  para o caldo, senón tamén adornar aínda máis o xa precioso patio que temos. Canda a moreira, o acivro, as tuias e as hortensias locen agora tamén as petunias que vimos de plantar.

COÑECEMOS ÓS NENOS E NENAS DO CEIP ALTAMAR

 Os nenos e nenas de 3 e 4 comezamos xa as videoconferencias coas que imos comunicarnos cos nosos amigos do Ceip Altamar. Xa o fixemos tamén o pasado curso. Os de 4 lembrábamonos ben, para os de 3 era a primeira experiencia. Antes da xuntanza fomos polo patio para mirar unha vez máis as arboriñas das que lles iamos falar.

O MARMELEIRO

A MOREIRA

E A NESPEREIRA

E despois con toda a información encendemos o ordenador e  fixemos a visita virtual. Foi emocionante. Presentámonos, falamos das árbores, amosáronnos algunhas plantiñas que teñen na aula...

Uns e outros montamos un pouco de lío, pero... a vez vindeira falaremos máis acalmadiños!.