“ConVIVINDO” NO CEIP PÁRRROCO DON CAMILO
O pasado venres visitounos no cole “VIVINDO”. Trátase dun obradoiro impartido por Apamp “Asociación de Familias de Persoas con Discapacidade” que aborda contidos relacionados coa inclusión, a diversidade e a convivencia, encadrado dentro do Proxecto ConVIVINDO.
O alumnado de educación infantil participou nas actividades propostas coa compaña de “Vivindo” e a música de María Fumaça.
Que ledicia, pintando e bailando todos xuntos!
Chegou o último día de curso deste primeiro trimestre!
Unha xornada na que entregamos as nosas cartas cos nosos desexos e agasallos.
Unha visita moi especial e chea de maxia... Papá Noel chegado dende o Polo Norte cun agasallo moi chulo!
Durante os días de decembro, foron aparecendo na aula de 4º uns agasallos que configuraban un calendario de advento moi especial. Cada día traía consigo unha cita, unha pregunta ou unha pequena reflexión sobre a maneira de relacionarnos, a inclusión, o respecto, a solidaridade...
Pensamos e debatimos cada un dos agasallos atopados, facendo desta clase un lugar seguro e cómodo para todos e todas.
O alumnado de 4º terminamos onte as nosas sesións con Rocío, coa que compartimos 4 obradoiros sobre prevención de adiccións. Ela compartiu con nós algunhas FERRAMENTAS para poder tomar decisións que nos fagan sentir ben e que sexan boas para nós.
Nun primeiro obradoiro, tras unha choiva de ideas sobre o que é unha adicción e aclarar este concepto con cousas que xa sabiamos, centrámonos en intentar ser como somos, evitando que os demais teñan unha gran influencia ou poidan forzarnos a que fagamos cousas que non queremos.
Rocío púxonos o conto de "YO SOY" que compartimos con vós, pois ademais de gustarnos pensamos que é moi interesante. Fixemos un coloquio e reflexionamos sobre as etiquetas coas que cargamos cada un de nós.
No segundo obradoiro, descubrimos que é imprescindible comunicar o que pensamos e sentimos e tamén sobre dicir NON, pero non vale de calquera maneira. Temos que falar en calma de forma ASERTIVA. Estivemos facendo uns xogos de rol para poñer isto en práctica. Na terceira sesión continuamos a practicar a comunicación facendo uns murais EN EQUIPO.
Para pechar estes obradoiros, na cuarta sesión elaboramos cadanseu diario sobre o que somos, o que valoramos en nós, polo que estamos orgullosos e que podemos mellorar ou cambiar.
Traballar a autoestima, quererse e valorarse, é fundamental para ser e para tomar boas decisións, que nos fagan sentir cómodos.
Grazas a Rocío pola súa cercanía e as súas palabras máxicas para mellorar a convivencia e o respecto neste mundo!
Sabemos que o mundo das emocións é algo complicado... sentimos moito e non sempre sabemos recoñecer o que nos pasa e atopar unha forma de regularnos. Por esta razón, o alumnado do segundo ciclo de primaria pasou todo o curso creando o seu EMOCIONARIO.
Un emocionario persoal no que recolle como vive cada emoción e o que necesita en cada momento. Cada un de nós somos diferentes e debemos coñecernos moi ben para atopar o noso benestar en diferentes situacións...
Os nenos de 2º de primaria descubriron o conto "La fábrica de etiquetas", e así, poideron sacar fóra todas aquelas palabras referidas a eles que tanto lles molestan, e racharon todas! Que mellor forma de sentar as bases emocionais, que falando dos nosos medos...
O pasado outubro, o país enteiro conmoveuse despois de escoitar o acontecido nalgúns municipios de Valencia tras o paso da DINA.
Fronte esta situación, unha profesora da Comunidade Valenciana pensou que nenos e nenas ían precisar axuda emocional ao longo dos próximos meses. Por esta razón, puxo en marcha o proxecto "Cartas solidarias", que consiste en establecer un vínculo a través de cartas, debuxos... entre un cole afectado e outro non afectado.
O grupo de 3º EP enviou cartas e debuxos con palabras de ánimo e cariño ao alumnado do cole CEIP San Blas (Albal, Valencia).
Esperamos que as nosas palabras axuden e reconforten e que estas cartas sexan as primeiras doutras moitas!
A familia é moi importante para o noso benestar e felicidade e tamén ten o seu día de celebración, o 15 de maio. Os cativos de infantil quixeron agasallar ás súas cun pequeno traballiño. Todo comezou na aula de psicomotricidade, onde compuxeron as letras da palabra familia cos seus corpos. Estas letras tan especiais serviron de base para adornar un precioso cartel que con moita ledicia levaron para a casa. Acompañaron este traballo cun poema da poetisa portuguesa Maria Rosario Macedo, no que fala da importancia deste vencello cos nosos.
Despois da chuvia aproveitamos o soliño deste comezo de semana para sementar leitugas e tomates, que tiñamos agardando que o tempo mellorase. Os nenos e nenas de 3, 4 e 5 anos fomos pasando pola horta a poñer en práctica as nosas habilidades de agricultores. Agora temos que coidalos ata conseguir degustar unha rica ensalada! Xa vos contaremos!
Os nenos e nenas de 4 fixeron con elementos naturais uns preciosos cadros de primavera. Un xeito emocionante de achegarnos ó noso medio.
Nalgunhas aulas faremos tamén o noso maio e bailaremos e cantaremos arredor del!.
O pasado venres os nenos e nenas de infantil e primeiro gozamos dunha fermosa experiencia nos xardíns da fundación Sales, no arboretum. Durante varias horas puidemos observar árbores, plantas e algúns animais nunha contorna harmoniosa e dunha gran beleza. Escoitamos as explicacións que nos deron sobre as distintas especies, demostramos o que nós xa temos aprendido no noso PDI, tocamos as distintas texturas das plantas, gozamos coas especies acuáticas, xogamos nun bosque de bambúes e puidemos decorar unha maceta biodegradable e plantar a nosa propia leituga.
Foi outro xeito de gozar do bosque e mailos seres vivos e seguir concienciándonos da súa importancia para a vida e para a nosa felicidade. Moitas grazas ás monitoras que nos acompañaron e nos amosaron unha chea de marabillas!
Un anuncio da biblioteca na procura de lectores para o obradoiro "Hoxe le...", que nos fagan gozar do xardín nos días soleados e nos acheguen historias relacionadas coa horta e o xardín e os coidados do medio natural está convertindo á hora de ler nun tempo de lectura no que o noso patio-bosque é protagonista e espazo lector. Xa temos un mundo de nenas e nenos preparando as súas lecturas e agardando a súa quenda. A horta de Simón e o Carballo con botas foron os primeiros libros lidos a semana pasada e esta, na que celebramos o día do libro. Primeiro foron os nenos de 4 anos os lectores e os de 4º como público. Hoxe as lectoras Zoe e Carla de 3º leron para infantil de 3 e 5 O carballo con botas e crearon conciencia.
O martes 16 de abril, os alumnos de 5º e 6º de educación primaria gozamos dun concerto ofrecido polos mestres/as da Escola Municipal de Música de Vigo.
Presentaron o concerto con diferentes xéneros musicais e, ao mesmo tempo, ían narrando historias, misterios e curiosidades do Pazo Quiñones de León.
Esta mañá chegou un sobre cun contido moi especial á aula de 4º EP 
Nenos e nenas do CEIP As Solanas, un cole de A Guarda, escribíronnos unhas cartas contándonos cousas da súa localidade. Foi unha sorpresa moi bonita recibir estas cartas, fíxonos moita ilusión 
Aproveitamos o que nos contaban sobre as súas praias e os seus montes para coñecer a Terra da Desembocadura do Miño. Investigamos e buscamos información e imaxes dos seus sitios favoritos.
Agora tócanos a nós escribir e falarlles do noso cole e da nosa vila. 
.JPG)
.JPG)