COUSIÑAS QUE QUEDARON ATRÁS: A VENDIMA E OUTRAS TRADICIÓNS. ALIMENTÁMONOS EN OUTONO

MARMELO DO COLE, VENDIMA, ZUME DE UVA, LIMONS GALEGOS E MILLO. APRENDEMOS  NO OUTONO SOBRE ALIMENTACIÓN SA.

As fotos da degustación do marmelo podedes velas en instagram.

 

FACEMOS GALLETAS CON MARUXA

 Maruxa é un conto que nos acompañou dende o 2º trimestre. Tiñámolo de libro do mes de marzo e gozamos moito coa espilida avóa Maruxa que foi quen de conseguir que o seu home Pepiño traballase tamén nas tarefas de cociña. 

Despois de gozar un mundo coa súa lectura, quixemos facer fan coma Maruxa e Pepiño e iso fixemos. Xa o vistes nunha entrada anterior. Aos poucos dias, os de 4, fixemos a Pepiño con masa de barro e plastilina, pero... faltábanos algo. Por que non facemos unha Maruxa de galleta e comémola?dixeron todos. Dito e feito. Invitamos os amigos de 3 anos que son moi marchosos e metémonos en fariña.  Fixemos dúas galletas, unha de Maruxa e outra de Pepiño. Amasamos todo o ben que poidemos, aínda que se nos foi a man botando o sucre!  As facianas dos personaxes fixémolas como soubemos. 

Somos pequenos para estas argalladas, pero o importante non é o resultado; senón que fomos moi felices facendo galletas e pensando en compartilas coa nosa familia. Daquela, obxectivo cumplido! Dentro de moitos anos seremos de certo os mellores cociñeiros e pasteleiros!

UN RICO PASTEL

 O conto Un rico pastel ,que formou parte de gastronómicas propostas neste curso, acompañounos no día de hoxe nas voces lectoras e os bonecos de Sofía, Olivia, Alana e Julia de 2º. As catro contáronnos a tódolos compañeiros de infantil, 1º e 2º este divertido conto no que sucede que cando son moitos a opinar as cousas non sempre saen como deberían.

LEITUGAS, LEITUGUIÑAS

A  nosa horta vai dando os seus froitos,  malia o tempo e os caracois. Puidemos ver xa unha das pataquiñas polas que agarda o caldo de Rosalía. De certo que hai moitas máis!. Os nosos amigos de 3 recolleron xa as súas leitugas. Ollade que boa pinta! Os demáis comezaremos enseguidiña tamén a recolleita!.

1º e 2º tamén visitan o Porto de Vigo!

Seguindo o ronsel dos nosos compañeiros, o alumnado de 1º e 2º tamén queríamos coñecer o Porto de Vigo por dentro, así que o mércores 7, e con paraugas na man, dirixímonos ao centro de Vigo. 

A experiencia resultou ser moi enriquecedora por todo o que descubrimos: tipos de embarcacións, diferencias entre mariscos dependendo da súa orixe, tanques para viveiros, e mesmo coñecemos a "Shakira" e o seu compañeiro, dous falcóns que intimidan ás gaivotas, para que non entren en contacto co produto fresco que chega do mar, e así protexer a nosa lonxa. 

Estabamos encantados cos nosos chalecos reflectantes, fixádevos!

FACEMOS PAN TAMÉN EN 5

 Os nenos e nenas de 5 pasaron a mañá de onte megullados na tarefa de facer pan. Mesturaron e amasaron ata conseguir que a masa tivese a textura axeitada para poñela a levedar. Despois dun tempo de espera e cruzando os dedos para que o forno funcionase puideron envolver e levar a casa os bolos feitos por eles. Segundo contaron "as crónicas" os pans estaban moi moi bos. Sodes uns artistas!

SAÍDA AO PORTO DE VIGO

Hoxe martes, día 6 de xuño, as nenas e nenos de 3º e 4º do cole fixemos unha saída para coñecer de primeira man as instalacións e o traballo que se fai dentro do Porto de Vigo. Comezamos cunha explicación das artes de pesca e os tipos de barcos; seguimos cunha visita á sala de conservación do peixe fresco e conxelado, pasando logo á zona dos viveiros de marisco, onde pudimos ver e tocar en vivo moitos destes animais dos que nós xa sabiamos unha morea de cousas. Antes de saír desta zona pasamos pola sala de elaboración, onde estaban a preparar algúns peixes para proceder ao seu reparto por distintos puntos da nosa xeografía. Rematamos visitando a lonxa e converténdonos por uns intres en vendedoras e compradoras facendo a poxa da mañá. Toda unha experiencia...

FACEMOS PAN EN 3 E 4

 Metidos como estivemos neste curso coas mans na cociña, promovendo unha alimentación sá e caseira,  non quixemos rematar  sen probar a facer pan. Maruxa , a avoiña do conto, facía un pan moi rico. O pan é alimento tradicional na nosa Galicia e son moitos os cereais cos que se fai.  Os de 4, ademais  coa súa ollada posta na cultura exipcia, aprenderan que o pan era alimento fundamental daquela, ademais de servir de moeda. Así que todos xuntos,os pequenos de 3 e de 4 ,“metémonos en fariña” e ben cediño comezamos co choio.

Preparar os ingredientes (fariña de centeo, lévedo, sal e auga), amasar con moito agarimo, facer una bola estupenda, poñela en panos quentiños para ela levedar axeitadamente e fornear. Todos estes pasos demos con moita ilusión para poder comer pola tarde un bo anaco de pan na merenda. Nos fixémolo todo moi ben. O forno non quería axudar moito…había tanto tempo que non o poñíamos a funcionar!. Pero tras algún que outro problemiña, os nosos boliños saíron do forno con moito arrecendo e moi boa pinta. Ogallá que o seu sabor non decepcionase porque nós puxemos todo da nosa parte. E coma sempre imos por diante, a nosa experiencia vailles servir moito ós nosos amigos de 5 anos que dentro duns días tamén van facelo. Xa nos contaredes!

METIDOS EN FARIÑA. ESCENAS DOS CONTOS

 No conto Maruxa, que nos encantou, eliximos o personaxe de Pepiño para facer o noso cadro con masa. Fixemos unha composición con barro branco e plastilina coa figura do personaxe e pasámolo moi ben.

A PRAZA DE ABASTOS DE BUEU

 O venres 19 de maio os alumnos de 5º e 6º visitamos o porto, a lonxa e o mercado de Bueu.  Explicáronnos as diferentes actividades que se levan a cabo nunha xornada habitual.  Rematamos tomando unha merenda mariñeira.

ACTIVIDADES FAMILIAS

MONTAXE EN VÍDEO DA BANDA DESEÑADA

 Como xa vos contamos hai tempo os nenos e nenas de 5º confeccionaron bandas deseñadas adicadas á problematica do planeta. Escribiron e ilustraron as súas historias e gravaron os textos na radio escolar. Un traballo completo! Agora  mentres agardamos que rematen de preparar a interpretación da música que vai acompañar a montaxe do programa de radio, podemos xa gozar dun vídeo no que están recollidos tódolos cómics feitos.

FAI CLIC NO TEU BOCATA 2ª parte

 Tamén os nenos de infantil 1º, 5º e 6º en outras quendas xogamos e aprendemos como  as conservas e os vexetais axudan á nosa saúde e puidemos comer riquísimos bocadillos cos ingredientes que escollemos.

FAI CLIC AO TEU BOCATA

Hoxe martes, día 9 de maio, as nenas e nenos de 2º, 3º e 4º do cole fixemos unha actividade sobre hábitos alimenticios onde aprendemos como facer un bocata de xeito máis saudable. Vimos moitos aspectos do mundo do mar: artes de pesca, características dalgúns peixes, o labor das conserveiras…

Logo fixemos un xogo de preguntas e respostas no que estivemos moi ben, aínda que algunha pregunta era algo difícil... Rematamos preparando un bocadillo con peixe en conserva, queixo, hortalizas… A verdade é que estaba boísimo! 

OBRADOIRO DE GANCHO

Paso a paso os participantes no obradoiro de gancho que se iniciou no mes de novembro van rematando as redes e bolsas de merenda que están a facer. O traballo con fío que están a facer forma parte do desenvolvemento do PDI na súa achega ao mar e os obxectivos relacionados coa alimentación saudable.

 

AMORODOS E LEITUGAS NA HORTA ESCOLAR

 Mentres seguen a medrar as patacas, berzas e fabas plantadas en febreiro seguimos a traballar na horta plantando leitugas e amorodos

TÍ SI QUE ES UN BO PEIXE

 As pescudas documentais do noso PDI, que se reflicten no estupendo mural do mar que vimos construindo dende principio de curso e que vai mudando a súa faciana con novos contidos, complétanse con varias actividades complementarias que se van sucedendo, pouquiño a pouco, ao longo do tempo. Desta volta tódolos nenos e nenas, dende 3 anos ata 6º de primaria, en varias quendas, adaptando os contidos a candaseu nivel,  asomámonos ao ximnasio para aprender e xogar coas actividades preparadas por este programa da consellería. Temos só as fotos de infantil, primeiro, quinto e sexto, pero xa sabedes que en canto teñamos as demáis poñeremolas aquí.

AMORODOS NOS ZAPATOS

 Ademáis das petunias que plantamos aí atrás, adornámo-lo noso patio cuns zapatos amorodeiros. A primavera tráenos beleza e moitas vitaminas.  Que bonitos quedan! Mentres coidamos as nosas plantiñas, agardaremos a que as cores vermellas pinten as nosas froitas e poidamos probalas. Non digades que non traballamos polo planeta e pola nosa saúde!

Quixemos tamén continuar o círculo comezado no outono co baleirado das cabazas. Despois de sementar e observar o medre poderemos de novo usar as nosas propias cabazas para celebrar o Samaín e degustar sobremesas e outras receitas feitas con este alimento tan san e tan tradicional.

VISITA DE SABELA FERNÁNDEZ

 O pasado 21 de abril achegouse á nosa biblioteca SAbela Fernández autora do libro ladrón de soños,  escollido este curso para a lectura na aula dos nenos de 1º e 2º de primaria. Gozaron un mundo coas súas historias e aproveitaron coma sempre a levar asinados por ela os exemplares do seu libro.

PLANTAMOS ÁRBORES NOS MONTES DE COMESAÑA

 A mañá deste mércores 29 de marzo os nenos e nenas de 5º e 6º foron os protagonistas da plantación de noventa novas árbores autóctonas como cerdeiras, freixos, castiñeiros e sobreiras. A primeira parte da experiencia foi recibir explicacións relacionadas co funcionamento da comunidade e a importancia de contar con montes repoboados despois dos incendios, tal como aconteceu en 2017. Despois de encher toda a finca de “Talliños” con novas especies fixemos un paseo polos arredores desfrutando das espectaculares vistas da cidade de Vigo e a súa ría.