1º e 2º en Alcampo - Coia

O alumnado de 1º e 2º fixo a súa primeira visita a Alcampo, situado en Coia, para coñecer 

o funcionamento deste hipermercado. Percorremos os diferentes corredores, poñendo 

máis atención nas froitas e verduras, así coma na peixería, para coñecer produtos non tan 

comúns nas nosas casas, así como as peculiaridades de determinados peixes e mariscos. 

Unha vez colocados os delantais e cubrebocas accedemos á parte destinada aos traballadores, 

na que se preparan os produtos para a súa venda ao público. Compartimos momentos cos 

panadeiros, que estaban afanados entre tanta fariña, así como coa sección de carnicería, na 

que vemos como traballaba o carniceiro e os seus axudantes, e o empaquetado e etiquetado

posterior. Agasalláronnos cunha pequena merendola que desfrutamos, antes de marchar, 

moi contentos por esta nova experiencia. 

 

FAI CLIC NO TEU BOCATA 2ª parte

 Tamén os nenos de infantil 1º, 5º e 6º en outras quendas xogamos e aprendemos como  as conservas e os vexetais axudan á nosa saúde e puidemos comer riquísimos bocadillos cos ingredientes que escollemos.

FAI CLIC AO TEU BOCATA

Hoxe martes, día 9 de maio, as nenas e nenos de 2º, 3º e 4º do cole fixemos unha actividade sobre hábitos alimenticios onde aprendemos como facer un bocata de xeito máis saudable. Vimos moitos aspectos do mundo do mar: artes de pesca, características dalgúns peixes, o labor das conserveiras…

Logo fixemos un xogo de preguntas e respostas no que estivemos moi ben, aínda que algunha pregunta era algo difícil... Rematamos preparando un bocadillo con peixe en conserva, queixo, hortalizas… A verdade é que estaba boísimo! 

TÍ SI QUE ES UN BO PEIXE

 As pescudas documentais do noso PDI, que se reflicten no estupendo mural do mar que vimos construindo dende principio de curso e que vai mudando a súa faciana con novos contidos, complétanse con varias actividades complementarias que se van sucedendo, pouquiño a pouco, ao longo do tempo. Desta volta tódolos nenos e nenas, dende 3 anos ata 6º de primaria, en varias quendas, adaptando os contidos a candaseu nivel,  asomámonos ao ximnasio para aprender e xogar coas actividades preparadas por este programa da consellería. Temos só as fotos de infantil, primeiro, quinto e sexto, pero xa sabedes que en canto teñamos as demáis poñeremolas aquí.

CHARLA SOBRE A RECONQUISTA DE VIGO

  O 8 de marzo tiñamos un roteiro polo casco histórico da nosa cidade sobre “A Reconquista “ para recordar a fabulosa fazaña de botar ao exército francés fóra da nosa vila durante a Guerra da Independencia, pero como a mañá foi moi chuviosa , tivemos que conformarnos coa visita dun historiador que sabe moitísimo sobre o tema e un soldado francés moi simpático que se colou no noso colexio.

INFANTIL NO MUSEO DO MAR

 Mesmiño ca os nosos compañeiros de 1º e 2º, nós quixemos ver cos nosos propios ollos moitos dos  peixiños cos que estamos a traballar e vemos xa no mural do cole. Dito e feito, collemos emocionados o autobús e marchamos para aló. Non fomos sós. Canda nós viñeron o compañeiros de 5 anos. Eles mesmos contaránvolo.

Para moitos de nós era a primeira vez que viaxabamos no bus e que iamos a un museo. Cando chegamos alí descubrimos que había moitas cousas interesantes que ver e puidemos observar e tocar as cunchas deses moluscos que coñecemos, aprender cousas sobre o seu medre no mar e contar os dentes dos tiburóns!!. Mimá!  Tiñan 3 ou catro filas de dentes!!. Ademais puidemos ver un enorme dente de megalodón. O acuario tamén foi xenial observando como ían e viñan tiburóns, raias e enormes peixes. A maragota e a robaliza  viñéronnos saudar. O boi saudou dende o alto dunha rocha. Ben sabían eles que estiveramos a aprender cousas sobre a súa vida! Antes de marchar os pequenos de 3 e 4 puidemos ver en directo como unha das tiburonas poñía un ovo. Díxonos Itziar, a nosa monitora, que era cousa moi dificil de ver. Que sorte tivemos! 

1º e 2º coñecen o Museo do Mar de Galicia

O 23 de febreiro o alumnado do primeiro ciclo de primaria visitou o museo situado en Alcabre. Escoitaron atentos sobre os moluscos máis coñecidos, os que están acostumados a ver na ría de Vigo, e puideron tocar vieiras, mexilóns, lapas, caramuxos, caracolas de mar... Ademais tiveron moito coidado ao tocar unha mandíbula de tiburón para non mancarse, xa que tiña uns dentes moi afiados!

A visita completouse cun recorrido polo acuario, na que observaron tiburóns, rodaballos, sargos, e mesmo ovos de peixe raia, que de cando en vez vemos polas nosas praias! 

Por suposto que tamén falamos da importancia de manter a nosa contorna o máis limpa posible, reciclando todos os plásticos, para que os nosos mares e océanos estean nas mellores condicións para albergar a tantas especies mariñas.

1º, 2º e 3º de primaria visitan "El Cuerpo Humano"

O venres 16 de decembro o alumnado dos cursos baixos de primaria coñeceu a exposición interactiva a tamaño xigante sobre o corpo humano. A exposición, situada en Coia de forma temporal, con motivo das festas navideñas, permitiulles tocar e explorar diferentes órganos do corpo e as súas curiosidades. Aquí tedes unha mostra do que fixeron:

CIENCIA EN GALEGO. VISITA A NATURNOVA

 Os nenos e nenas de 1º e 2º tamén visitaron Naturnova para seguir aprendendo cousas sobre o noso planeta e como coidalo. Todo o aprendido acáenos de marabilla co desenvolvemento do noso PDI anual e xa agardamos que eles mesmos nos conten todo o que viron e experimentaron. As estacións, o mundo mariño, a reciclaxe... De certo que xa nos levan vantaxe co "proxecto residuos cero" que vimos de comezar en outubro.