TRABALLAMOS OS POLIEDROS EN 6º DE PRIMARIA

 

Durante as últimas sesións de Matemáticas, o alumnado de 6º de Primaria traballou os poliedros a través dunha actividade manipulativa e moi motivadora. Empregando fíos, construíron diferentes figuras xeométricas tridimensionais, o que lles permitiu identificar e comprender mellor os seus elementos: caras, arestas e vértices.

Unha vez rematadas as construcións, os alumnos e alumnas analizaron as características de cada poliedro e aplicaron os contidos traballados na aula para calcular a súa área e o seu volume. Desta maneira, puideron relacionar a teoría coa práctica e consolidar os seus coñecementos de xeometría dun xeito máis significativo.

Esta proposta favoreceu a aprendizaxe activa, o desenvolvemento do razoamento matemático e o traballo cooperativo, ademais de fomentar a creatividade e a capacidade de resolución de problemas.

Pintamos o Drac do Parque Güell

O alumnado converteuse en auténticos artistas coa creación das súas versións do famoso Drac do Parque Güell, unha das obras máis coñecidas de Antoni Gaudí.

Despois de descubrir curiosidades sobre este emblemático dragón e sobre o estilo artístico de Gaudí, os nenos e nenas experimentaron con diferentes técnicas plásticas para dar vida ás súas creacións.

Empregaron pintura, combinacións de cores e técnicas inspiradas nos mosaicos característicos do artista, como os trencadís, conseguindo traballos moi creativos, coloridos e cheos de personalidade.

A actividade permitiulles coñecer mellor a arte modernista e experimentar coas posibilidades da expresión artística a través de diferentes materiais e formas de pintar.

O resultado final foi unha exposición de dracs únicos e orixinais que encheron as aulas de cor e imaxinación. Parabéns polo fantástico traballo realizado!

Bocetos da Golden Gate Bridge

Seguimos descubrindo o fascinante mundo da arquitectura e dos grandes monumentos dos Estados Unidos coa realización de bocetos da famosa Golden Gate Bridge.

Inspirados pola nosa auxiliar de conversa americana, o alumnado observou e analizou as características desta coñecida ponte: a súa estrutura, as liñas, as torres...

Despois da fase de observación, chegou o momento de converterse en artistas e deseñadores. Os nenos e nenas realizaron diferentes bocetos nos que traballaron as proporcións, os detalles e a perspectiva para representar a ponte do xeito máis realista posible.

A actividade permitiulles desenvolver a capacidade de observación, a precisión no debuxo e a creatividade, ao mesmo tempo que coñecían un dos símbolos máis representativos de San Francisco.

O resultado foi unha colección de traballos moi coidados e cheos de talento.

Creamos o noso Empire State Building

O alumnado de 1º, 2º e 3º de Primaria participou nunha actividade moi creativa xunto coa nosa auxiliar de conversa, achegándose a un dos edificios máis famosos dos Estados Unidos: o Empire State Building.

Primeiro descubrimos curiosidades sobre este emblemático rañaceos de Nova York, a súa altura, a súa historia e a importancia que ten na cidade. Despois, os nenos e nenas puxeron en marcha toda a súa imaxinación para realizar debuxos e creacións inspiradas neste famoso edificio.

Con moita ilusión, empregaron caixas para crear o seu propio Empire State Building.

Ademais de aprender sobre arquitectura e cultura americana, esta actividade permitiulles practicar vocabulario en inglés e desenvolver a expresión artística dun xeito divertido e motivador.

Experimentamos coa capacidade en Matemáticas

O alumnado de 4º de Primaria tivo unha divertida sesión de Matemáticas dedicada á medición e comparación de capacidades.

Empregando diferentes botellas, recipientes e vasos medidores, os nenos e nenas realizaron actividades prácticas para descubrir como medir líquidos e comparar cantidades. A través da experimentación, foron comprobando que non sempre o recipiente máis alto é o que ten maior capacidade e aprenderon a utilizar diferentes unidades de medida de maneira máis precisa.

Ao longo da sesión, fixeron estimacións, realizaron trasvasamentos e compararon resultados, traballando de forma manipulativa conceptos matemáticos relacionados coa capacidade e o volume.

Esta actividade permitiulles aprender dunha maneira práctica e divertida, fomentando a observación, o razoamento e o traballo en equipo.

Mosaicos con simetría radial en Arts

O alumnado de 5º de Primaria puxo en marcha toda a súa creatividade cunha actividade artística moi especial: a creación de mosaicos seguindo unha simetría radial.

Empregando materiais reciclados como cartón e rolos de papel hixiénico, os nenos e nenas deseñaron composicións cheas de formas, equilibrio e cor. Primeiro descubriron que é a simetría radial e observaron exemplos presentes na arte, na natureza e na arquitectura. Despois, chegou o momento de experimentar e crear as súas propias obras.

A partir de pequenas pezas elaboradas cos rolos e o cartón, foron construíndo mosaicos orixinais nos que todas as formas se organizaban arredor dun punto central, creando efectos visuais moi atractivos e sorprendentes.

Con esta actividade, ademais de traballar conceptos artísticos e xeométricos, o alumnado puido desenvolver a creatividade, a precisión e a importancia da reutilización de materiais para crear arte.

O resultado final foi unha colección de mosaicos moi coloridos e cheos de imaxinación.

Construímos a nosa propia Golden Gate Bridge

No cole convertémonos en auténticos enxeñeiros e enxeñeiras coa creación dunha maqueta da famosa Golden Gate Bridge dos Estados Unidos, inspirados pola nosa auxiliar de conversa americana.

Antes de comezar a construción, investigamos e descubrimos moitas curiosidades sobre esta emblemática ponte: onde está situada, como é a súa estrutura...

Despois chegou o momento de poñernos mans á obra. Por equipos, analizamos a estrutura da ponte e deseñamos cada unha das pezas necesarias para a súa construción. Pouco a pouco, fomos unindo o traballo de todos e todas ata conseguir unha espectacular ponte vermella que nos deixou moi orgullosos.

 

Con esta actividade traballamos a creatividade, a cooperación e a capacidade de planificación, ademais de achegarnos á cultura e aos lugares máis coñecidos dos Estados Unidos dunha maneira moi divertida e práctica.

Parabéns ao alumnado polo gran traballo realizado e pola fantástica maqueta conseguida!

FACENDO APRENDO

 E así, case sen decatarnos, estamos chegando ao final… Este último venres de maio na clase de 1º os xogos volveron ser os protagonistas da nosa aprendizaxe: estradas e coches para ordenar, labirintos que seguir, e unha tenda onde poñer a proba o noso manexo do diñeiro… Queriamos compralo todo, pero non sempre era doado atopar a cantidade xusta para pagar…

Museos Científicos da Coruña

Esta semana, os nenos e nenas de 2º, 3º e 4º de primaria tivemos a oportunidade de realizar unha saída moi especial á cidade da Coruña para visitar os seus museos científicos. 

Foi unha experiencia moi divertida e tamén chea de aprendizaxes, na que puidemos descubrir, experimentar e sorprendernos coa ciencia dun xeito práctico e entretido.

A nosa primeira parada foi no Aquarium Finisterrae, onde observamos numerosas especies mariñas e aprendemos máis sobre os océanos e a importancia de coidar o medio mariño. Un dos momentos que máis nos impresionou foi ver ao gran tiburón Gastón e outros animais mariños tan de preto.

Despois visitamos o Domus. Alí descubrimos moitas curiosidades sobre o corpo humano, os sentidos, as emocións e o funcionamento do cerebro a través de xogos e actividades interactivas nas que participamos con moito entusiasmo. Grazas a unha balanza puidemos comprobar a cantidade de auga que tiñamos no corpo!

Por último, achegámonos á Casa das Ciencias e ao seu planetario, onde puidemos seguir experimentando e aprendendo sobre a ciencia e o universo. A sesión no planetario encantounos, xa que nos permitiu observar as estrelas e coñecer un pouco máis sobre o espazo. Viñemos con deberes para casa, pois temos que buscar un sitio sen contaminación lumínica e observar o ceo para atopar o planeta Venus e algunhas estrelas e constelacións como fixemos na simulación do planetario!

Foi unha xornada inesquecible na que compartimos experiencias, aprendemos moito e desfrutamos xuntos dunha saída diferente e moi enriquecedora. Sen dúbida, unha aventura científica que tardaremos en esquecer.

Matemáticas manipulativas en 2º de primaria!

 

Os nenos e nenas de 2º de primaria aprenden  a través do emprego das regletas a desenvolver capacidades do pensamento lóxico-matemático como (a cantidade, as equivalencias, a suma ou a resta). Deste xeito as regletas son un material eficaz para a aprendizaxe multisensorial das matemáticas, xa que facilitan a comprensión de conceptos abstractos a través da manipulación, o xogo e a visualización.

Mate-estacións en 4º!

 

O alumnado de cuarto traballou matemáticas por estacións de aprendizaxe, pasando por diferentes actividades nas que puideron practicar os contidos dun xeito máis dinámico e participativo. 

Unha forma distinta de aprender, colaborando e movéndose, que fixo a sesión máis entretida e proveitosa.

OBRADOIROS MATEMÁTICOS 1º TRIMESTRE

 O alumnado de 1º acaba de comezar o seu camiño pola Primaria con moita enerxía e actitude. Así van aprendendo unha morea de cousas entre a aula STEM, os obradoiros de xogos, as saídas e visitas… Deixamos aquí algúns deses inesquecibles momentos…

Xogos STEAM: Kapla, Korbo e Lego

 

Durante o 2º trimestre os alumnos e alumnas de 2ºP realizaron construccións de figuras co KAPLA. Este xogo fomenta a experimentación manipulativa e vivencial. Tamén promove o traballo en equipo tomando decisión de grupo. 

Crearon mecanismos e estruturas móbiles co set do material KORBO. Permitiu aos nenos e nenas verificar o efecto do movemento.

O BricQ Motion Essential LEGO Education achegou experiencias de aprendizaxe divertidas a medida que construían cos ladrillos LEGO.

A continuación, podedes ver o traballo experimental que realizou o alumnado.

 

 

 

 

 

XOGOS MANIPULATIVOS DE XEOMETRÍA

 

Durante este trimestre o alumnado de 4º de primaria traballou a xeometría dunha forma lúdica.

Empregaron os seguintos xogos para identificar e construír figuras xeométricas:

Dominó de figuras de mosaico

Fortalece a capacidade visual de diferenciación, exercita a apreciación de formas e consolida a capacidade de concentración.

 

Tangram

Permite traballar conceptos da xeometría plana e potenciar o sentido da orientación.

 

 

Flor encaixable de madeira

Estimula o pensamento lóxico e a aprendizaxe das formas xeométricas