E así, case sen decatarnos, estamos chegando ao final… Este último venres de maio na clase de 1º os xogos volveron ser os protagonistas da nosa aprendizaxe: estradas e coches para ordenar, labirintos que seguir, e unha tenda onde poñer a proba o noso manexo do diñeiro… Queriamos compralo todo, pero non sempre era doado atopar a cantidade xusta para pagar…
O día 19 de maio visitamos o que vai ser o noso centro de estudos o próximo curso. Da man dunha profe e de antigas alumnas do cole recorremos as instalacións: biblioteca, salón de actos, laboratorios, aula de música, aula de tecnoloxía, pavillón e tamén a cafetería.
Para finalizar, invitáronnos a merendar e voltamos ao colexio.
Foi unha mañá moi emocionante!!
Tamén os nenos de infantil 1º, 5º e 6º en outras quendas xogamos e aprendemos como as conservas e os vexetais axudan á nosa saúde e puidemos comer riquísimos bocadillos cos ingredientes que escollemos.
As familias que non puidestes acompañarnos xa podedes ver unha crónica da festa de entroido neste vídeo. Foron moitos días de preparativos para recuperar unha tradición que sufriu un parón obrigado por mor da pandemia. Pero,...xa estamos de volta!
Tamén gravamos pequenos vídeos nos que podedes vernos desfilar e bailar.
DESFILANDO
A BAILAR
O 22 de abril tivemos a primeira saída conxunta de 5º e 6º para coñecer o Real Mosteiro de Sta María de Oia.
Fixemos un percorrido polos exteriores e o interior do mosteiro que empezou a restaurarse polos anos 80 e segue con moitas zonas en ruínas.
O Mosteiro de Sta Mª de Oia non deixou de evolucionar dende 1132, no século XII, ata os nosos días. Trátase dun dous poucos exemplos de abadía xunto ao mar en Galicia, expostos a piratas e corsarios que devastaron as costas galegas durante varios séculos.
A súa singular situación, foi testemuño directo dos temporais do Atlántico e do tránsito de navegantes por diante da súa costa.
En 1624, despois dunha famosa loita contra piratas e bereberes, os monxes do mosteiro gañaron a batalla e Felipe IV concedéulles o título de Real e Imperial Mosteiro de Oia.
Tamén nos contaron como era a vida dos monxes dentro do mosteiro e o máis divertido foi ver un rabaño de cabras e cabritiños comendo herba polo exterior.
O mércores, día 20 de abril, os nenos e nenas do cole fixemos unha saída á Fundación Sales. Alí explicáronnos a historia do seu fundador: D. Francisco de Sales, un home amante das plantas ao que lle encantaba viaxar. Era tal o seu amor pola botánica que se converteu en paisaxista, facendo incríbles traballos por todo o mundo; a súa propia casa foi un exemplo da fusión das súas dúas grandes paixóns: as viaxes e a botánica. Pouco a pouco empezou a encher o seu xardín de plantas exóticas traídas de moitas partes do mundo, que mesturadas con outras autóctonas fixeron da súa finca un auténtico espectáculo capaz de trasladarmos a calquera parte do mundo: Xapón, América, Australia...
Paga a pena coñecer este fermoso lugar cheo de beleza, paz e tranquilidade.
Un día máis a ciencia entrou na nosa aula, esta vez da man de científicos da Universidade de Vigo cos que fixemos un obradoiro de experimentos con auga. O primeiro deles mesturou auga, lume e un globo... e así observamos como a auga absorbe a calor! Para o seguinte necesitamos filtros de café, auga e tinta negra. Foi incrible poder ver como se separaban as cores do negro pola acción da auga arrastrando as diferentes partículas (cromatografía). A continuación comprobamos como a pel, o metal e a auga son condutores da electricidade, e tamén entendimos que os materiais que teñen o mesmo índice de refracción poden enganar aos nosos ollos, parece maxia... non si? Comprobamos tamén como pode cambiar a densidade da auga se botamos sal nela, e ata chegamos a entender como funciona un submarino aplicando o principio de Arquímedes, si si, Arquímedes, ese home extraordinario que xa coñecemos hai algún tempo... En fin, sempre é un pracer recibir visitas que nos axuden a entender un pouquiño mellor como funciona este marabilloso mundo no que vivimos.
