Maxia e castañas con Lucía Mojón

Hoxe tivemos o pracer de recibir no noso colexio á escritora Lucía Mojón, quen compartiu cos alumnos de 1º e 2º de primaria unha mañá máxica chea de contos e imaxinación. ✨️🍂

Lucía presentoulles o seu conto "Biscoito de castañas" e explicoulles como xurdiu a idea para crealo. Os nenos descubriron fascinados que o libro esconde un xogo secreto que fai a lectura aínda máis divertida. A sesión estivo chea de momentos especiais: cantaron xuntos a canción do conto, deixaron voar a súa imaxinación debuxando seres monstruosos que poderían formar parte da historia, e para terminar, Lucía dedicou persoalmente o conto aos nosos pequenos lectores.

Unha experiencia inesquecible que sen dúbida espertou nos nosos alumnos o amor pola lectura e a creatividade.

VISITA DE MARÍA CANOSA

Formando parte das actividades da semana do libro na nosa escola hoxe os alumnos de 3º e 4º recibimos a visita da escritora María Canosa, autora de “Escola de bruxas”, historia que limos nas nosas clases durante estas últimas semanas e coa que gozamos e aprendimos dun xeito moi especial. 

María falounos das súas motivacións para escribir esta historia, así como dos valores que ela quería transmitir coa súa lectura: o valor da amizade, do esforzo, da familia… Toda unha lección de vida que nós agradecemos moitísimo e que nos anima a seguir lendo para encher as nosas vidas de aventuras e soños.

Mil grazas a todas as persoas que escriben e espertan a nosa imaxinación para transportarnos a mundos descoñecidos e enriquecer así as nosas vidas. Grazas María!

CONTACONTOS E VISITA DE AUTOR NO PRIMEIRO CICLO

David Rodríguez, autor e ilustrador do libro “Superavoa”, visitou o noso centro para contarnos a 1º e 2º curso de primaria, os grandes poderes de Rita, unha superheroína, que ben podería ser a avoa de calquera de nós.

Con este conto cheo de tenrura e de humor, o autor quixo homenaxear a todas as nosas avoas, contando os poderes que acostuman a ter todas elas: adiviñar o frío que vai na rúa, curar dores de barriga coa súa man máxica…

O noso alumnado tamén quixo compartir historias propias de cadansúa avoa, polo que resultou ser un contacontos moi emotivo.

Para rematar, e coa guitarra nas mans, o autor ensinounos unha canción, que coreamos con forza no retrouso.

VISITA DE AUTOR PARA 3º E 4º

 Este martes, día 21 de maio, visitounos na biblioteca do cole o escritor Eduardo Santiago, autor da obra "A miña amiga invisible". Contounos algunhas cousiñas sobre o proceso de creación do libro, así como de todo aquilo que o inspirou para comezar a escribilo...

A verdade é que gozamos moito coa súa lectura, e aprendemos algúns dos mecanismos que existen para enfrontar as dificultades que as veces nos presenta esta fermosa aventura chamada vida.

Ler fainos mellores!

VISITA DE SABELA FERNÁNDEZ

 O pasado 21 de abril achegouse á nosa biblioteca SAbela Fernández autora do libro ladrón de soños,  escollido este curso para a lectura na aula dos nenos de 1º e 2º de primaria. Gozaron un mundo coas súas historias e aproveitaron coma sempre a levar asinados por ela os exemplares do seu libro.

VISITA DE XABIER DOMÍNGUEZ

 MAXIA DE PEDRA

Por fin, por fin, por fin...Por fin chegou o día e con el a visita de Xavier Domínguez, un dos autores do libro "Maxia de Pedra".  Contounos moitas cousas sobre o proceso de elaboración e edición dun libro.  Foi moi interesante descubrir como se escribe un libro entre dúas persoas porque Maxia de Pedra está escrito a catro mans.

E o máis importante:  "Maxia de pedra" ten continuación.  Estamos agardando con ilusión a publicación da segunda parte!!

VISITA DA ESCRITORA MARÍA CANOSA

Hoxe xoves, día 13 de abril, as nenas e nenos de 3º e 4º do cole tivemos a sorte de coñecer a María Canosa, escritora do libro "A cazadora de estrelas" que lemos xuntos nas nosas aulas. Falounos moito do seu apaixoante traballo: a súa inspiración para cada libro, a necesidade de compartir as súas historias, e mesmo do poder da lectura para facernos persoas máis felices e libres... 

Deixámosvos un pequeno vídeo do encontro.

VISITA DE ÉRICA ESMORÍS

Patio de luces, este é o título do último libro que limos xuntos na escola. A súa autora, Érica Esmorís, visitounos o martes día 10 de maio para compartir con nós a historia que se agocha detrás desta marabillosa historia. Un confinamento, vellos recordos da nenez, un edificio de veciños, un porteiro entrañábel... E para nós, os nenos e nenas de 3º e 4º, un pracer escoitala e aprender... Mil grazas.

 

VISITA DA AUTORA ANDREA MACEIRAS

 Despois da lectura nas aulas de 5º e 6º do libro  A folla azul de Andrea Maceiras, a autora visitounos como estaba previsto e puidemos intercambiar con ela información e emocións sobre esta lectura.

VISITA DE ÁNXELA LOUREIRO

Ao longo deste trimestre os nenos e nenas de 3º e 4º limos un libro que nos divertiu e acercou moito ao mundo duns animais cuns costumes moi especiais: as ras. Gozamos moito con RaMona, RaFina e tamén con Milfaces, Napias... Pero o mellor foi cando a escritora desta historia, Ánxela Loureiro, visitou o noso cole para falarmos da incrible aventura que é converterse en escritora e imaxinar aventuras tan especiais como as que nos acompañaron ao longo desta marabillosa lectura...

VISITA DE PAULA CARBALLEIRA

O luns, día 28, os nenos e nenas de 3º e 4º tivemos a sorte de compartir a nosa xornada coa escritora Paula Carballeira. Chegou á escola a media mañá e esperounos na biblioteca cun gran sorriso e unha morea de cousas que contar... Falounos da súa nenez, dos primeiros contos inventados para os seus irmáns pequenos, da casa da súa avoa que, por certo, era moi semellante á de “Bruxa e familia”, o fermoso libro escrito por ela que limos e traballamos nas clases. O encontro fíxose curto pero foi un pracer ter compartido con ela esa xornada.

Visita de autor: María Canosa contounos en 1º e 2º "O día que choveu do revés"

A finais de marzo, anticipándonos un pouco ao día do libro, foi María Canosa a escritora que visitou aos nenos e nenas de 1º e 2º de primaria para contar a súa obra "O día que choveu do revés".

Aínda que o libro o traballamos os días previos nas aulas, encantounos esta historia na que as nubes decidiron chover os sete choveres, coa intención de que as os campos de millo e as verzas medrasen vizosas, sen pensar que poderían asolagar a vila de Portoseco.

Pero sen dúbida o que máis nos gustou foron as ideas tan imaxinativas que tiveron as nubes para solucionar o asunto e as moitas outras que xurdiron nas aulas. Estes cativos apuntan maneiras de escritores e ilustradores, coa súa imaxinación propoñen moi boas solucións ante os problemas. Así que xa sabedes: non vos esquezades de escoitalos a diario!.

Así foi, unha gran sorte coñecer en persoa a unha escritora coma María Canosa que ademáis de contarnos o conto, respondeu as nosas curiosas preguntas e deixou a súa pegada nos nosos libros con debuxos, fermosas palabras e a súa sinatura. Grazas María!

 

VISITOUNOS LEDICIA COSTAS!!!!!

      Poderiamos dicir que os libros de Ledicia son un gran tapiz de bordado con moitos fíos:  o fío dos recordos, o fío das vivencias, o fío da imaxinación, o fío da complicidade, do agarimos, dos soños,...

      E nós quedamos enredados no seu novelo, abraiados coas súas anécdotas e imaxinando como chegou Ledicia a escribir un libro tan fascinante como "A señorita Bubble".

       E é que no Párroco don Camilo somos verdadeiros admiradores da súa literatura e non podemos esquecer "Escarlatina", "Esmeraldina" e tantos outros que nos fan ter ese gusto pola lectura tan necesario.

       Os teus libros son un alimento enriquecedor.  Grazas por ensinarnos os fíos do teu novelo.

LEOCADIO, O LEÓN

Estes días andabamos moi atarefados lendo nas nosas aulas un libro titulado “Leocadio, o león”. A verdade é que estaba moi interesante xa que, pouquiño a pouco, fomos colléndolle cariño a ese leonciño que ía trazando a súa historia tan preto de nós. Despois de rematalo e, coincidindo co Día do Libro, recibimos un agasallo na biblioteca da escola que nos encheu de ilusión e emoción. Alí estaba Oli, o escritor do conto ao que lle adicamos tantos momentos na clase, compartindo connosco a súa traxectoria como escritor. Falounos de Leocadio e doutros moitos libros que tiña escritos, pero o máis emocionante foi cando nos ensinou o borrador da súa próxima historia que pronto estará nas librarías. Tamén nos relatou contos marabillosos e amosounos moitos tesouros que traía agochados no seu maletín. Para rematar asinounos os nosos exemplares e mesmo o da biblioteca do cole. Un pracer ter compartido con el este tempo.